Úff, farangursvesen! Hvenær kemur gullöld millilandsiglinga aftur. Það væri nú eitthvað að geta látið hífa fleytifullt koffort um borð en að vesenast þetta með fáein kíló og ekkert tannkrem í handfarangrinum. Fer reyndar með lest á morgun til að ná flugi frá London, svo það verður viss stíll yfir því. Fer með Great NorthEastern Railways sem mun vera eina lestarfélagið í Bretlandi sem notar eingöngu vagna og eimreiðar frá British Rail sáluga. Er samt ekki viss hvort það er sjarmerandi eða ekki. En það er nú búið að taka þetta allt í gegn og meira að segja þráðlaus internet og allt, svo það lofar góðu. Í framahaldi af því flýg ég heim með BA sem er náttúrlega alveg proper, en maður á nú samt eftir að sakna Þórunnar Lár. Er orðinn ferlega ryðgaður í mónólógnum, þyrfti bara að fá handrit sent frá Icelandair ef á að verða eitthvað vit í þessu. Á sunnudagsmorgun lendi ég svo í hlýjum faðmi Sigurðar Gunnarssonar og fjölskyldu. Ef mér reiknast rétt til mæti ég á staðinn u.þ.b. þegar heimilisfaðirinn er að ljúka við að ryksuga og rétt í þann mund að hella upp á seinna morgunkaffið.
Ritgerðarskil dragast fram á föstudag, m.a. af því leiðbeinandinn er á langri ráðstefnu í Grikklandi. Svona er lífið í akademíunni, blaðrinu er hespað af ráðstefnan er fyrir norðan Alpa en allir til í að ræða málin út í hið óendanlega á suðlægum slóðum. Sem vill til fyrir mig því það er búinn að fara mikið meira tími en ég hélt í alls kyns praktískt snatt. Það verður að viðurkennast að maður er búinn að vera hálf hauslaus í þessu ritgerðarstússi og ekki staðið sig of vel í almannatengslunum. En hlutirnir hafa verið að gerast hratt og eftir helgi er stefnt á að undirrita kaupsamninga vegna íbúðar á Barónsstíg 61. Þetta er náttúrlega frábær staður og býr mikið af góðu fólki á þessum slóðum. Þannig verð ég t.d. nágranni Hilmars & Hannesar, Geira, Palla E, Sigga og Huldu. Síðan býr Kiddý mín á næstu grösum uppi í Holtum og Kriss & Briss eru ekki langt undan í Barmahlíðinni.
Eftir að hafa pakkað niður draslinu hérna er ég gjörsamlega búinn að missa áhuga á að fylla nýju íbúðina með drasli. Hún verður bara máluð hvít og höfð gluggatjaldalaus. Kannski maður stefni á svona 80's minimalisma, eitt hvítt rúm og kókospálmi úti á miðju gólfi. Svo verður settur upp risa spegill í stofunni og æfður djassballet, nú og hjólað inni eins og í Quicksilver.
Kórinn hélt síðasta konsertinn í gær, prógramm með skoskum þjóðlögum og ég var nær yfirbugaður af tilfinningum áður en yfir lauk. Loch Lomond fór alveg með þetta: I'll tak the hi road and ye'll tak the lo road and i'll be in Scotland afore ya, but me and my true love will never meet agin, on the bonny bonny banks o Loch Lomond. En svo er ég nú alveg kominn yfir það, þetta var gott closure.
Veit samt ekki alveg hversu spennandi er að koma heim. Nú þarf maður að fara endurhanna matarræðið til að leggja megináherslu á ristað brauð, pasta og súrmjólk eins og einungis fimmtu ríkustu þjóð OECD sæmir. Kannski maður komist í einn og einn verndartollaðan kjúkling af og til. Á hinn bóginn er náttúrlega svo mikið af frábæru fólki heima sem manni hlakkar til að komast í alvöru lífræn samskipti við. Þannig lagað séð er allt framundan! Fæ svo kannski Kiddý og einhverja fleiri góða til að stofna aðgerðahóp frústreraðra heimilisrekenda. Við getum sett upp svona anarchist cookbook síðu á netinu og kennt fólki að smygla spægipylsum frá útlöndum.
Held það dugi ekkert minna en að setja með mynd af hinum fögru fögru bökkum Loch Lomond.
Sigga said...
Þú ert greinilega innblásinn af interiörinu hjá Patrick fyrrnefndum!
Kjúkling hvað!? Nei Kristinn, nú kaupir þú þér lambsskrokk og rollu, og gerir bjúgu, hangikjöt og rúllupylsu og tekur slátur - þessar húsmæður vinkonur þínar hljóta að hleypa þér inn í sláturtökukreðsur sínar (sem ég geri fastlega ráð fyrir að séu til!) Svo ferðu í berjamó og sultar. Ég hef mikla trú á þér og mun ekki liggja á liði mínu við að hvetja þig til verka!
said...
Saell Kristinn.
Ég hef mjög gaman ad blogginu thínu, er eiginlega reglulegur lesandi.
Ert thú alfarinn til Íslands?
Gaman ad segja frá thví ad ég er ad fara í brúdkaup 25. nov vid Loch Lomond.
Vonandi ad thú fáir góda einkun fyrir ritgerdina thína, toi, toi, toi.
Kv,
Bjarni
said...
Góða ferð heim Kristinn minn. Hlakka til að koma í kaffi á barónstíginn :) Við verðum að halda áfram að emailast reglulega þar til ég kem svo ég haldi geðheilsunni!!
Knús frá Lellu
said...
Ég skrái mig hér með í félag frústreðra heimilsirekenda eftir að hafa keypt tvær öskjur af jarðaberjum á 800 kall í gær og helmingurinn var myglaður. Einhver maður hélt því fram í blöðunum um daginn að sælgæti og gos væri munaðarvara þeirra sem væru lágt launaðir. Þessi maður kaupir greinilega ekki mikið í matinn því miklu ódýrara er að gefa fjölskyldunni snikers og kók í matinn en soðna ýsu.....
said...
count me in! Legg til að það verði bara hreinlega stofnað kaupfélag, keyptir skrokkar af hinum ýmsu skepnum á svörtu, fiskikassar í gegnum klíku, og reglulega haldnir peppfundir þar sem kynntar verða allskonar sparnaðarleiðir og plottað gegn Guðna!
said...
Jú, ég er til í kaupfélag og smygl og svo er ég líka til í að hanna uppskriftarbók sem inniheldur ódýran og hollan mat. Ekkert kók og snikkers
said...
Ég var svo pirruð yfir þessu öllu saman í gær að ég var næstum búin að fara til London fyrir 11þús í dag og fylla ferðatöskuna af mat. Við hjónin hefðum svo getað skellt okkur í borgarferð í vetur þegar við værum búin að éta úr töskunni.
said...
Djöfulsins væl er þetta. Seljið íbúðirnar ykkar, kaupið einbýlishús á Bíldudal og fyrir mismuninn getiði étið hangiket og humar í áratug. Svo ég tali nú ekki um parmaskinku. Allir að muna eftir Rock star í kvöld. Gilby Clarke var víst ekki par hrifinn af tónsmíðahæfileikum Magna. Hann þarf á öllum okkar stuðningi að halda í nótt og á morgun.
Kristinn said...
Ánægður með að þú fylgist með blogginu Bjarni og hafir gaman af. Já, ég er kominn til Íslands þangað til annað kemur í ljós. Góða skemmtun í skoska brúðkaupinu, viss um að það verður mikið stuð!
Slátur gæti komið sterkt inn, en ég vildi samt heldur taka slátur af fúsum og frjáslum vilja en út tollum og kvótum.
Það verður að setja aðgerðarhópinn í gang, gott að vita að fleiri eru pirraðir en ég. Held þetta sé spurning um að fara beint í að byggja upp svarta-markaðinn og leggja álög á Guðna.
Smygldeild Kaupfélagsins gæti svo borgað undir sakleysislega útlítandi fólk til að fljúga til Evrópu og koma til baka hlaðið mat. Briss, þú þyrftir eiginlega að reyna því þeir renna beint á spægipylsurnar hjá mér.
