Að mínu mati er Friðrik Klemenz Sophusson með lágkúrulegustu karakterum í íslenskum samtíma. Hvernig getur þessi maður, sem er einn af holdgervingum hreyfingar ungra sjálfstæðismanna sem sögðu báknið burt, verið framkvæmdastjóri þess að ríkisvæða íslenskt atvinnulíf með stórtækum hætti? Það að Sjálfstæðisflokkurinn standi að þessari ríkisstyrktu álvæðingu er hneyksli! Þetta er eins langt frá grundvallarsjónarmiðum flokksins og hugsast getur. Að heiðarlegur einkarekstur sé látinn blæða fyrir stórfellda uppbyggingu fyrir reikning ríkisins! Ég gæti vel skilið ef álmálin væru kafli í ævisögu Jónasar frá Hriflu, en að þetta fúsk eigi sér stað í dag - eru menn algjerlega gengnir af göflunum?
Ég ætla rétt að vona að Haarde drífi í því að selja sjoppuna og stövði þannig þetta rugl, því vitanlega gengur þetta ekkert án massívra ríkisábyrgða og ógegnsæs samkrulls orkusölu til rafveitna og stóriðju, að viðbættri niðursetningu á umhverfislegum fórnarkostnaði og ókeypis mengunarkvóta.
Mynd: althingi.is
said...
þetta er náttúrulega alger viðbjóður þ.e.a.s. hugmyndaauðnin,skammsýnin og einstefnuhugsunarhátturinn. Mér finnst eins og iðnbyltingin sé að koma til Íslands 150 árum á eftir öðrum, hvað varð um allt hið "ómengaða og hreina" hvenær hættu Íslendingar að sjá bjálkann fyrir flísini (möguleikanna fyrir álverunum) fyrir mér jafnast þessi hugsunnarháttur við ekkert annað en landráð
said...
En hverjar eru þessar grundvallarhugsjónir Flokksins?
er það gamli Flokkurinn hans Sverris Hermannssonar eða öfga nýfrjálshyggjan han Péturs Blöndal? Í gegnum tíðina hefur Sjálfstæðisflokkurinn ekki verið tregari til stórfenglegra ríkisframkvæmda en hver annar. Hann hefur verið við völd núna síðan 1991 og þann tíma hefur verið stöðugur vöxtur hjá hinu opinbera. Hvort sá vöxtur hefði verið meiri hjá kommunum er annað mál. Mér finnst þessi grundvallargildi vera eitthvað prjál sem helst er flíkað á stórafmælum Flokksins og þegar óánægir segja sig úr honum.
Kristinn said...
Ég er nokkuð viss að hvort sem dæmið væri borið upp við gömlu hörðu íhaldsmennina sem stofnuðu flokkinn, frjálslyndu velferðarsinnanna sem Gunnar Thoroddsen ruddi brautina fyrir, eða Pétur Blöndal og dogmatíska frjálshyggjumenn þá myndu þeir allir segja að það væri grundvallaratriði að atvinnulífinu, framtakssemi einstaklinga, væri ekki settar skorður með beturvitrungshátt ríkisins. Í þessu tilviki þykist ríkið augljóslega vita betur, og það er ekki bara að setja mönnum skorður heldur beinlínis að ryðja út vissum atvinnugreinum. Þess vegna er ennþá undarlegra að menn eins og t.d. P. Blöndal séu ekki arfavitlausir yfir þessu.
Annars er þetta ansi góður punktur, og myndi vafalítið bæta stjórnmálin umtalsvert ef leiðtogar Sjálfstæðisflokksins, og e.t.v. annarra flokka, myndu annað slagið efast örlítið um eigið ágæti og spyrja sig til hvers þeir eru í forsvari fyrir þjóðina og hvað þeir standi fyrir.
Síðan er náttúrlega frábær rannsóknarspurning fyrir stjórnmálafræðinga hvort geti verið að Sjálfstæðisflokkurinn sé örlítið þynntur sósíaldemókratískur valdaflokkur a la Skandinavía með vænni gusu af framsóknarmennsku sem haldi að hann sé frjálslyndur hægriflokkur.
Kristinn said...
Verst að það finnast ekki kol á Íslandi þá gætum við tekið iðnbyltinguna með trompi.
Kristjan said...
Einkavæða draslið...
Varðandi Sjálfstæðisflokkinn og stjórnmálafræði þá passar hann ekki inn í nein líkön og er ekki heldur spegilmynd af einhverjum flokki erlendis. Einfaldlega vegna þess að hægt er að finna nánast allan skalann innan flokksins, allt frá mönnum sem vilja ríkisábyrgðir og landbúnarstyrki til þeirra sem aðhyllast hugmyndir um lágmarksríkið, og svo allt þar á milli. Flokkurinn mætti því skilgreina sig betur gagnvart kjósendum, þessar mótsagnir eru einkennilegar.
Kristinn said...
Mér er létt að það sé hin stjórnmálafræðilega niðurstaða að flokkurinn sé illskilgreinanlegur, maður verður hálf pirraður á að reyna það.
Nú tökum við upp slagorðið "Seljum sjoppuna!"
