Aldeilis magnaðar fréttir að það séu í byggingu eða stefni í byggingu á fimmta tug íbúða á Ísafirði. Samkvæmt fréttum Rúv eru 6 hús risin á Tunguskeiði og 15 lóðum hefur verið úthlutað nýlega. Síðan er verið að búa til 20 íbúðir í Norðurtanganum og 4 held ég Neista II. Þannig má segja að grundvallar breytingar hafi orðið á væntingum markaðarins um framtíðarhorfur Ísafjarðar. Hefði einhver spáð þessu fyrir ári þá hefði ég sagt hann galinn. Mitt mat var að það þyrfti mikið afdráttarlausari skilaboð frá ríkisvaldinu til að yfirgnæfa suð um niðurlagningu fjórðungsins svo einkageirinn tæki við sér. En greinilega hafa aðstæður breyst, ýmislegt lagst á eitt, og bærinn þar með stimplað sig rækilega inn sem þriðji byggðarkjarninnn á landsbyggðinni.
Síðan var veðrið svo fallegt í sjónvarpsfréttunum að þjóðarstoltið ætlaði að æra mig. Glampandi sól og snjór. Dökkblátt og hvítara en allt hvítt. Finnst ég ekki hafa séð svona veður í mörg ár, því það var samfellt hlýindaskeið (nær) allan tímann sem ég vann á BB og páskafríin þar á undan voru ansi köflótt. Líklega síðan 1999 eða 2000 þegar var sögulega gott páskaveður og massamikill snjór á skíðasvæðinu. Annars er ég búinn að ganga öll 12 skref skíðasorgar svo ég er sáttur þó verði enginn snjór í ár. Verð bara heima að spá í mat og fer á Aldei fór ég suður.
Nú vona ég bara að fólk taki þessar byggingar með trukki og klári húsin í einum rykk, og bærinn verði snöggur að fullklára gangstéttar og tilheyrandi. Bráðabirgðahurðar, óklædd hús og malarlóðir með nagladrussi eru alveg búnar að vera. Það má ekki gera borgarbúunum það til geðs þegar þeir mæta á Porsche jeppunum sínum til að fara á Hornstrandir að hnignunarklámið blasi við á leiðinni inn í bæinn. Liðið býst við ljótum húsum sem í býr fólk í flíspeysum og það má ekki staðfesta þá fordóma. Fólk verður þá bara að fá sér krumpugalla og ganga alla leið yfir í Sopranos fílínginn!
Að lokum má ég til með að benda öllum á undirskriftasöfnun sem fram fer á netinu um réttarbætur til handa hommum og lesbíum, og er hýst af Deiglunni, hinu ágæta vefriti frjálslyndra hægrimanna. Þetta eru höfuðhagsmunir því fyrr sem þetta gengur í gegn get ég fengið mér krumpugalla og farið að ættleiða. Nei djók..., ef til þess kæmi yrði ég mikið stæl-foreldri. Tæki mér Gullu Pæju til fyrirmyndar!
Hér er tengillinn: http://www.mannrettindi.net/undirskrift/index.php
Finnst þetta viðeigandi farfuglamynd. Reyndar er þetta jólabirta, en ég á ekki mynd með páskabirtu.
said...
Halló Kristinn!
Ég man svo vel eftir páskunum '96, þá voru þeir svona frekar seint eins og í ár og karamelluregnið var niðrí bæ. Það þótti frekar sérstakt. Ég var einmitt að ganga á hóteltúninu með Lindu vinkonu á leið á leikæfingu hjá Kriss þegar byrjaði að rigna töggum.. það var í glampandi sól og nánast engum snjó!
Mikið hlakka ég til páskanna!
Klem
Sigga
Kristjan said...
Isss Fasteignasjónvarpið var nú löngu búið að skúbba þessu með nýbyggingar og skipulagsmál á Ísafirði. Fengu auk þess promo frá localvefnum = http://www.bb.is/?PageID=141&NewsID=65635
Fáðu þér svo einn Erdingerdjöffsa í tilefni af því að bjórinn fær bílpróf í dag!
said...
Ohhh je minn eini hvað ég fékk mikla heimþrá núna, langar svo heim um páskana!!! Ég verð að fara að drullast til að flytja heim, þetta gengur ekki lengur. Falleg mynd af farfuglinum og Ísafirði...
Ella írska.
said...
Sjitt hvað mig langar heim um páskana! Kristinn heppni.
Kristinn said...
Topppáskar framundan, ekki spurning! Og fyrir mörgu að skála. Nýfæddri Steinunni Margréti dóttur Huldu og Herberts, 17 ára afmæli bjórsins eins og Stjáni stuð bendir á, og svo voru 10 ár í gær síðan Olof Palme var skotinn. Ekki spurning að maður fær sér öllara í kvöld.
Kristinn said...
Hvað er ég að rugla, það eru náttúrlega 20 ára síðan Palme var veginn. Og ég ætla náttúrlega ekki að skála fyrir morðinu á honum á sérstaklega. Æji þið vitið...
said...
við skulum vona að Háli mistúlki þetta ekki, þ.e. hlaupi ölóður um götur Stokkhólms og skáli fyrir dauða Palme. Það væri samt mjög findið að fylgjast með, svona fyrstu 5 mínúturnar... og bjarga svo Hála uppí þyrlu
said...
Háli er byrjaður í bjórnum en ekki farinn að skála fyrir Olaf nokkrum ennþá. Heyrðu Kristinn, hvernig á hin sænska vs. íslenska eftir að breytast næstu vikuna eða tvær - er að fara að millifæra pening og vantar góða dagsetningu. ;)
said...
Dóra! Þú ert snillingur, afhverju var ég ekki búin að fatta að spyrja Kristinn um þetta fyrr!? Kristinn, getur þú haldið krasjkúrs í gjaldeyrisspámennsku um páskana? Svona klukkutíma fyrirlestur?? Svo væri hægt að slá námskeiðinu upp í gott partý á eftir!
Sigga
Kristinn said...
Ég myndi veðja á að u.þ.b. núna væri góður tími. Væntingar vegna stóriðju á Húsavík gætu haft áhrif til styrkingar næstu daga. Svo sýnir tölfræðin að markaðir eru sterkari á föstudögum en öðrum dögum. Mín tilfinning er að gengið verði í svipaðri stöðu og nú eitthvað áfram, örlítið upp og örlítið niður, en lækkunarferli fari að hefjast. Það eru vísbendingar um að verðbólgan heima ætli að ganga hratt niður og ef það skapar væntingar um að vaxtalækkanir séu fyrirsjáanlegar þá eru hlutirnir fljótir að gerast. Reynslan sýnir þó að Seðlabankinn lætur verðlagið njóta vafans þegar kemur að vaxtalækkunum svo þetta gæti tekið lengri tíma. Eins af því næsta ár er kosningaár og því vill Seðlabankinn vera með tennurnar úti gagnvart slökum fjárlögum. Menn virðast líka áhugasamir um viðskiptahallann þessa dagana og jafnvel er í spilunum að áhrif stóriðju hafi verið ofmetin.
En það gæti verið allt eins gott að rýna í garnir, hvernig þetta fer allt saman fram byggir fyrst og fremst á einhverskonar markaðssentimenti. Vísindin segja að gengið sé ofmetið, hvenær lækkunin verður svo er milljón dollara spurningin.
Norrænu gjaldmiðlarnir eru væntanlega frekar stöðugir svo varla þarf að spá mikið í þeim. Ég þekki ekki vel sýstemið hjá þeim en held að Norge og Sverige reyni að halda föstu bili gagnvart Evru.
