Í gær var gluggaveður, sól og frekar svalt til loftsins. Í dag var alvöru góðviðri, sól og hlýindi, sem var góð tilbreyting eftir tvær rakar vikur. Af því tilefni hefur kúnum hér í Veldwezelt verið hleypt út. Þannig rak mig í rogastans í dag þegar ég hjólaði venjulegu leiðina í skólann og rakst á kúastóð steinsnar frá húsinu mínu. Ég hafði aldrei veitt þessum grasbala athygli en allt í einu var búið að setja upp senu sem gæti átt við auglýsingu fyrir Milka súkkulaði - þvílíkur stuðvaki í góða veðrinu. Nú þarf maður að fara að kíkja á strútana!
Hér hefur áður verið minnst á ýmsa ferfætlinga og fugla sem íbúar hverfisins halda, og því meira sem ég sé því magnaðara finnst mér þetta. Mjög töff að mixa saman sveit og úthverfi. Almennt þykja mér sveitir ljótar og úthverfi óspennandi en blandan er góð. Hvað segir Sigríður í Ósló um þetta - gæti þetta verið framtíðarmúsík fyrir landbúnaðinn?
***
Núna eru tvö heit mál í gangi á Ísafirði, stóra menntaskólamálið og stóra snjóflóðavarnamálið. Mér finnst stóra menntaskólamálið mikið áhyggjuefni en það bendir allt til þess að það sé rétt að byrja. A.m.k. bendir ekkert til þess að lausn sé í sjónmáli. Það eru allir búnir að vera voða passífir og hafa vonað að þetta myndi ganga yfir en annað á eftir að koma á daginn. Næsta stig í málinu er að það verða allir dregnir ofan í skotgrafir og síðan á málið eftir að festast í farinu og verða þar árum saman. Ef einhver von á að vera til þess að svo fari ekki og málið verði leyst, verða menn að halda haukfráum fókus á að lausnin er stjórnunarlegt viðfangsefni enda varð vandinn til innan MÍ en ekki í DV. Vona bara að fólk fari ekki hlaupa upp til handa og fót og kenna þeim um.
Hitt málið er svo stóra snjóflóðavarnargarðamálið. Ég las grein Jóns Fanndal á bb.is og finnst vera helst til mikið fát á garðyrkjumanninum skarpa og staðarhaldara flugvallarbarsins, en kannski má segja að nógu stór orð til að vera úr hlutföllum við varnargarðinn séu vandfundin.
Verður ekki alltaf erfitt að deila um fagurfræði? Skutulsfjörðurinn er ekki náttúra í sama skilningi og hálendi Íslands, Hornstrandir eða jafnvel hinir firðirnir í Djúpinu. Fyrir löngu var ákveðið að hann yrði vettvangur menningar sem hefur sett varanlegt mark sitt á ásýnd hans. Þannig finnst mér kjarrið í Tungudalnum ekki mikilvægari hluti af heildarmyndinni en húsin í Hafnarstrætinu eða Kubbinn merkilegri en Ásgeirsbakkinn. En það er á okkar ábyrgð að skipuleggja svæðið vel og passa upp á að því verði ekki klúðrað. Þess vegna er fagnaðarefni að menn séu tilbúnir að setja kraftana í að skrútínera fyrirhuguð varnarmannvirki. Það er líka ábyrg pólitík að vilja ekki seilast dýpra í ríkisvasann en þörf er á - það eykur trúverðugleika okkar Vestfirðinga.
Þegar snjóflóðagarðarnir voru byggðir í Seljalandsmúlanum voru margir á nálum, ég meðtalinn, því inngripið í umhverfið yrði ekki aftur tekið. Eftirá er ég sáttur við garðinn og finnst hann ekki lýti á umhverfinu. Kannski er of snemmt að kveða upp úrskurði, verður jafnvel að bíða nokkur ár til að sjá hvernig hann grær upp - vonandi fær hann ekki sinuásýnd eins og vegkantur þegar fram líða stundir.
Hvað sem því líður verður að hafa í huga að spurningin um snjóflóðavarnargarða í Skutulsfirði snýst ekki um umhverfisleg prinsipp eins og Kárahnjúkar eða Eyjabakkar, heldur smekk - rétt eins og það hvort manni finnst kirkjan eða Neisti hafa bætt bæjarmyndina.
Ég er spenntur fyrir vörnum í Kubbanum. Stálstrípurnar í fjallinu munu gefa firðinum módernískt yfirbragð og harmónera vel við Fokkerinn þegar hann flýgur yfir Hafrafellshálsinn. E.t.v. verður maður ekki eins spenntur þegar jarðýturnar verða mættar í Stórurðina, eins og liggur fyrir að gerist innan fárra ára, enda er um smekksatriði að ræða, ekki prinsipp.
Kristjan said...
Já þetta er athyglisverður punktur með MÍ, að málið verði í rifrildaformi næstu árin. Ekki er heiglum hent að losa sig við Skólameistara ef þörf þykir, því þeir eru ráðnir til 5 ára í senn að mér skilst. Hið jákvæða í opinberi umræðu er það að Guðjón Ólafsson skuli loksins vera að fá þá umfjöllun og athygli sem hann á skilið.
said...
Er Gauji Ólafs komin inn í umræðuna?
Ég veit ekki með þessa varnargarða út um allt, svei mér þá... ef fólk ætlar að búa undir fjallshlíð verður það þá ekki bara að gera það og reyna að slappa af? Á í alvöru að reyna að verja allstaðar þar sem hugsanlega eitthvað gæti gerst...einhverntíma eða aldrei? Ég skil ekki hvar ætlar fólk þá að láta staðar numið, endar þetta ekki bara í einhverri vitleysu og allir fara að heimta einhverjar varnir hér og þar og allstaðar... Held að það væri nær að efla eftirlit og rannsóknir á aðstæðum þar sem hætta væri fyrir hendi og vera þannig betur undirbúin...
Kiddý
said...
Ég held að samningurinn hennar renni út að ári. Byrjaði 2001. Hún var svaðaleg í Kastljósinu, ég bjóst við að hún myndi allt í einu breytast í einhverja tröllskessu, Jóru eða Gilitrutt, svona eins og í gömlu ævintýri. Augun skutu gneistum..
Sveit í borg.. Það er þekkt hugtak. Held það sé langt í að Íslendingar komist á það stig siðmenningar að geta sætt sig við að dýr (kisur og voffar svo dæmi séu tekin) geta líka átt heima í borgum og bæjum.
Við erum nú engir Færeyingar, með 3 rollur í garðinum.
Kveðjur úr Kristjaníu
Sigga
Kristinn said...
Já svei mér þá, ég er skíthræddur við að þetta endi í langvinnri pattstöðu þar sem fermingarveislur ár eftir ár snúist upp í það hverjum sé hvað að kenna í MÍ. Ég held að flestum sem hér koma við ætti að vera í fersku minni andúðin á BT-Thunder sem kraumaði undir niðri á stór-Ísafjarðarsvæðinu svo árum skipti án þess að menn hefðu manndóm í sér til að annaðhvort reka kallinn eða veita honum brautargengi. Þetta var ekki pródúktíft fyrir skólann. Hann verður alltaf að vera stærri en einstaka skólameistarar eða kennarar.
Maður tekur undir það, varðandi garðana, að það hlýtur alltaf að vera betra að ráðast í þau mál af meiri forsjá en kappi. Annars finnast mér þessir garðar alls ekki ljótir, reyndar þykir mér Morgunblaðshöllin falleg og líka húsið við hliðina á Hótel Borg svo ég veit ekki hversu viðurkenndur smekkur það er. En samkvæmt áætluninni á að vera búið að verja allt fyrir 2009 ef ég man rétt. Næsta mál á dagskrá er að hanna varnarmannvirki sem munu líklegast ná meira og minna eftir öllum Urðarveginum.
Þessi sveit í borg pæling er mjög spennandi, það væri alveg upplagt að taka hana til meðvitaðrar skoðunar á Íslandi. Hentar fólki eins og mér mjög vel, sem er afskaplega lítið fyrir dýr en finnst gaman að sjá þau í öruggri fjarlægð bakvið girðingar. Ég segi bara áfram Hlíðarendabændur!
said...
Er ekki málið að setja dempara í suðurlandsundirlendið, til að verja fyrir jarðskjálftum? Bora stórum feitum gormum í jörðina? Setja svo alla í skothelt björgunarvesti, leggja fjallaklifurstauma niður göturnar, sem við getum fest okkur við á ferð okkar um bæi, svo ekki fjúkum við út í buskann.
-Eiríkur
